Main PageTroubadours' ListingMore Works by Bertran d'Alamano

The prosody guide is available as a book. Click here for details.

De uos mi rancur, compaire
Em Bertram, qe no-m faiz be,
Qe-us ai seruit ses cor uaire
E nul profeiz no m'en ue!
E si no-m uolez ben faire,
Eu dirai de uos tal re
Qe-us enoiera, so cre,
Car sai trop de uostr' afaire.

Granez, pos uolez retraire
De me so que no-s coue,
Eu pugnerai en desfaire
Cho qe si sabes be:
Arloz es plen de put aire,
Q'eu te leuei de non re,
Don degras partir ab me
So qe dels altres pos traire.

Seigner, per qe-us celeria
Flaces'e cubitat gran
E-ls mals aibs q'apres auia,
So sabez c'ab uos estan.
Cant no-m tengron pro nul dia,
Ni-m feron mas anta e dan,
E iois no-n ais, mais affan,
Mon gazaing per qe-us partria

Desconoscenzha e ffollia
Granez, me dis en chantan,
E sapchas qe anc nul dia
Non te forfis mas sel an
Q'eu te mis en iugleria,
C'anavas als pes trotan!
E qar mon dreg te deman,
Ar me dis tu villania.

Vostra razo no-m par bona,
Seigner, q'en manz locs diuers
Laus uostra flancha persona,
E qerez mi mais enquers,
Part de tot qant c'om mi dona!
Ainz uolgra fosses greues!
Car sol los diz m'en sunt fers,
Mal aia qi-m n'arazona.

Granez, chascus m'ocaissona
Car anc n'en pren lo ters,
E no-m cal c'om uos dispona,
Car ben entendez mos uers. . .