Main PageTroubadours' ListingMore Works by Bertran d'Alamano

The prosody guide is available as a book. Click here for details.

Pueis chanson far no m'agensa,
Farai un nou seruentes
Q'er de l'afar de Proensa,
E trametrai-l als Frances!
Qe si fai lonia bestensa
Cel qi es coms e marqes,
Tart li rendran per temensa
Sas rendas li Marseilhes,
De co qu'el prendia el port
E de l'alre qe-il fan tort.

Lai li man en souinensa
Q'el uenga en cest paes,
Q'el pert d'Avignon sa renda,
Si tot sos paires conqes,
E d'Arlle, a ma paruensa,
Tot so qe-l pros coms y pres,
E de cai d'Aus, part Durensa,
Lo comtat de Gabenses!
Mas si non fai long acort,
Ia non perdra camps ni ort.

Mas ges en co non entenda
Le coms, qe per seiornar
Ni per far lonia bestenda
Puesca sai sos dreitz cobrar!
Anz lh'er ops qe-l man estenda
E pens de souen armar,
E qe tueilha e don e prenda,
S'onrada gerra uol far!
Q'aissi cobrara l'onor
Qe zai pert a desonor.

. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .

Tan mala ui s'acoindansa
Qi-l mes cai en cest pais,
Qe cel qi la moilheransa
Feron, n'iran am caps clis!
Mas se-l fils del rei de Fransa
Pert sai enfre sos vesis,
Tart conqerra per semblansa
Outramar Turcs ni Colmis,
Qar qi mal demanda-l sieu,
Grieu conqerra l'autrui fieu.

S'en brieu non fai comensansa
Le coms, ben sui certz e fis
Qe tant l'autra partz s'enansa,
Qar tan seiorn' a Paris.
Per qe pes' en la balansa
Mas le mals qes hom en dis,
No fai le bes ni l'onransa,
Se meil cai no s'afortis!
Mas tot o reuenra lieu,
Sol li faig non syon grieu.