Main PageTroubadours' ListingMore Works by Bertran d'Alamano

The prosody guide is available as a book. Click here for details.

D'un sirventes mi ven gran voluntatc
Ce-l fas' ausir a tutc cominalmen
E qu'ieu dirai de las grantc poestatc,
De cells ques an de l'enperi conten,
C'al mieu senblan il regnan folamen,
E-l papa mal, car los ten e balansa.
Be-m merauegll car igll an esperansa
Ques a nengun en fas' autregiamen,
Puois c'el a d'els renda d'aur e d'argien.

Al papa val l'enperi e-l regnatc
Mais ce sc'era tut sieu domeniamen!
Car plus monta l'auers c'es presentatc
Per acest plai a lui e a sa gen
Ce li renda ce us enperaires pren!
E puois d'auer n'a tan gran aondansa,
No mi sembla ce ga-i met' acordansa,
Ces ell non a en alre son enten,
Per ce lo monc n'es tut e turbamen.

Gia aices platc non er sentenciatc.
Puois ce li rei uolon abreuiamen,
Ab caualiers et ab cauals armatc
E ab uasal bon de concerimen
Vegna cascus apoderadamen,
E en un camp fasan un'aital dansa
C'al departir gasagne l'uns l'onransa!
Puois decretals no-i noseran nien,
Puois troberan lo papa bendisen.

Aicell sera fil de Dieu apelatc
Ce aura fait al camp lo uensimen!
Pe los clerges el er leu coronatc,
Car il veran c'aura-n l'afortimen!
Adonc seran tutc a sun mandamen,
Car ades an clerges aital ucansa
Ce, can trobon pairo de gran puisansa,
Tut cant il uol fan ben e umilmen,
E puois sun dan, quan veison ce deisen.

E si als reis so c'ieu lur dic non plas,
Als podon far, ces er miels per un sen,
Ces outramar si pert crestiandas,
E si pason apoderadamen,
Remanra tot so de c'om los repren!
E autresi pases lo rei de Fransa,
El aunt primers, ses longia demoransa,
E-l reis Gaumes, qu'a l'astr'e l'ardimen
Del Serasis mescre gens d'autra gen.

Assas ai dic a cascun, si m'enten,
Dels autc princes, e ai ferma speransa
Ce, s'il pasan ses longia demoransa,
Cristiandat garderan d'aunimen,
Gacainhan Dieu e pres e saluamen.

Reis castelans, car soberanamen
Est soiberans de fin preis et d'onransa,
Donas vos suoign, segner, qu'ieu ai dutanca
Ce vostre pres non prenna mermamen,
E faitc, segner, ce-l tengas autamen.

Dell papa sai ce dara largamen
Pron del perdon et pauc de son argen!

E s'outra mar non fan seccors breumen,
Li terra-s pert ses tot revenimen.