Main PageTroubadours' ListingMore Works by Peire d'Alvernha

The prosody guide is available as a book. Click here for details.

Be m'es plazen
E cossezen
Que om s'ayzina de chantar
Ab motz alqus
Serratz e clus
Qu'om no-ls tem ja de vergonhar.

D'aut chai em bas
Qui per compas
No sap lo segle demenar!
E ben hi falh
Qui tan trassalh
Que non hi puesc'a temps tornar.

Ben es auras
Totz crestias
Que ia nems si vol encombrar,
Ni sobre-l cays
Leva tal fays
Que corren no-l puesca portar.

Qu'ieu sai e sen
Mon escien,
E vuelh vos en tot castiar,
Per trop captens
Val hom mot mens
E ten hom plus vil son afar.

Mais am un ort
Serrat e fort
Qu'hom ren no m'en puesca emblar
Que cent parras
Sus en puegz plas:
Qu'autre las tenh'ez ieu las guar.

Quel reprochiers
Es vertadiers
Que dels antics auzi comtar:
Lo ric al ric,
E l'om mendic...:
Quecx d'eis semblan troba son par.

De tot can suelh
Amar, me tuelh
E so qu'ei amat desampar,
Qu'ieu non am re
Ni autre me
E cug me totz d'amor lonhar.

Qu'arreire temps
Ai amat nemps
E vuelh m'en atrazach layssar!
Non aura grat
Qui m'a amat
Ni en cor m'avia d'amar.

Qu'ieu ai un cor
Et un demor
Et un talan et un pessar
Et un amic
Vas cui m'abric
Et a cuy me vuelh autreyar.

Si mal m'en pren
Per eys mon sen,
Cug a ma vida follejar!
Apres ma mort
No-m fass'om tort
D'aquo qu'ieu ai ad oblidar.

Daus manhtas pars
Me for'afars
En prendre o en gazanhar!
Fers e parvenz
Es mos talenz
Vas m'amiga qu'eu tenc plus car.

..........
..........
..............
Amors de lonh,
Tan gran besonh
Qu'ai de tener e de balhar.