Main PageTroubadours' ListingMore Works by Peire d'Alvernha

The prosody guide is available as a book. Click here for details.

En estiu, qan crida-l iais
E reviu per miei los plais
Jovens ab la flor que nais,
Adoncs es razos c'om lais
Fals'amor enganairitz
Als volpillos acropitz:

Li sordeior e-il savais
N'an lo mieills e-l meins del fais:
Pauc so prezon, qui-s n'irais.
Amarai, mas non puosc mais,
Que de tal amor sui guitz
Don sai que serai trahitz.

Pres ai estat en caslar,
Ab so que no-i aus estar,
E pero non puosc mudar
De mos enemics no-l gar!
Ja non serai assaillitz,
Q'en auta roch' es bastitz.

Si-l portiers me vol iurar
C'autre non i lais intrar,
Segur poirai gerreiar!
Mas al sagramen passar
Tem que serai escarnitz,
Que mil vetz i sui faillitz.

Lai sui plevitz e iuratz
Q'ieu non am ves autre latz,
Mas d'aisso es grans pechatz
Q'eu am e non sui amatz!
Totz temps ai fag plaitz e ditz
Per q'eu sui gen acuillitz.

A Dompnidieu qier solatz
Per q'ieu si' enamoratz,
Q'en aital hora fui natz
C'anc non puoc amar en patz,
E platz mi car sui issitz
De la terr' on fui noiritz.

Amor mi lais Dieus trobar
On ia no-m posc afiar,
E qant ieu la tenrai car,
Ill pens de mi enganar!
C'adoncs mi tenc per garitz,
Qan mi ment tot cant mi ditz.

Assatz a a cavalgar
Qui la cuid 'autra trobar,
C'aissi co-l cels clau la mar,
Non pot hom gaire trobar
Que non sion camiairitz
Vas drutz e vas lor maritz.

Totz temps deu esser marritz
Qui d'aital amor es guitz.