Main PageTroubadours' ListingMore Works by Bernart de Ventadorn

The prosody guide is available as a book. Click here for details.

Pel doutz chan que.l rossinhols fai,
La noih can me sui adormitz,
Revelh de joi totz esbaitz,
D'amor pensius e cossirans!
C'aisso es mos melher mesters,
Que tostems ai joi volunters,
Et ab joi comensa mos chans .

Qui sabia lo joi qu'eu ai,
Que jois fos vezutz ni auzitz,
Totz autre jois fora petitz
Vas qu'eu tenc, que.l meus jois es grans.
Tals se fai conhdes e parlers,
Que.n cuid' esser rics e sobrers
De fin' amor, qu'eu n'ai dos tans

Can eu remire so cors gai,
Com es be faihz a totz chauzitz ,
Sa cortezi' e sos bels ditz,
Ja mos lauzars no m'er avans!
C'obs m'i auri' us ans enters,
Si.n voli' esser vertaders,
Tan es cortez' e ben estans.

Cil que cuidon qu'eu sia sai,
No sabon ges com l'esperitz
Es de leis privatz et aizitz,
Si tot lo cors s'en es lonhans .
Sapchatz, lo melher messatgers
C'ai de leis, es mos cossirers,
Que.m recorda sos bels semblans.

Domna, vostre sui e serai,
Del vostre servizi garnitz.
Vostr' om sui juratz e plevitz ,
E vostre m'era des abans.
E vos etz lo meus jois primers,
E si seretz vos lo derrers,
Tan com la vida m'er durans .

No sai coras mais vos veirai!
Mas vau m'en iratz e maritz.
Per vos me sui del rei partitz,
E prec vos que no.m sia dans,
Qu'e.us serai en cort prezenters
Entre domnas e chavalers,
Francs e doutz et umilians .

Huguet, mos cortes messatgers
Chantatz ma chanso volonters
A la reina dels Normans.