Main PageTroubadours' ListingMore Works by Bernart de Ventadorn

The prosody guide is available as a book. Click here for details.

Pois preyatz me, senhor ,
Qu'eu chan, eu chantarai!
E can cuit chantar, plor
A l'ora c'o essai.
Greu veiretz chantador,
Be chan, si mal li vai.
Vai me doncs mal d'amor
Ans melhs que no fetz mai
E doncs, per que m'esmai

Gran ben e gran onor
Conosc que Deus me fai,
Qu'eu am la belazor
Et ilh me, qu'eu o sai.
Mas eu sui sai, alhor,
E no sai com l'estai
So m'auci de dolor,
Car ochaizo non ai
De soven venir lai .

Empero tan me plai
Can de leis me sove,
Que qui.m crida ni.m brai,
Eu no.n au nula re.
Tan dousamen me trai
La bela.l cor de se ,
Que tals ditz qu'eu sui sai,
Et o cuid, et o cre,
Que de sos olhs no.m ve.

Amors, e que.m farai
Si garrai ja ab te
Ara cuit qu'e.n morrai
Del dezirer que.m ve,
Si.lh bela lai on jai
No m'aizis pres de se,
Qu'eu la manei e bai
Et estrenha vas me
So cors blanc, gras e le .

Ges d'amar no.m recre
Per mal ni per afan !
E can Deus m'i fai be,
No.l refut ni.l soan.
E can bes no m'ave,
Sai be sofrir lo dan,
C'a las oras cove
C'om s'an entrelonhan
Per melhs salhir enan.

Bona domna, merce
Del vostre fin aman
Mas jonchas, ab col cle,
Vos m'autrei e.m coman.
Qu'e.us pliu per bona fe
C'anc re non amei tan .
E si locs s'esdeve,
Vos me fatz bel semblan,
Que molt n'ai gran talan,

Mon Escuder e me
Don Deus cor e talan
C'amdui n'anem truan.

Et el en men ab se
So don a plus talan,
Et eu Mon Aziman

Play the original melody

Can't hear anything? Click here to download the original melody (MIDI), or try to convince your browser to play it by following these instructions.