prosody | miscellaneous |
Estat ai com om esperdutz Per amor un lonc estatge, Mas era.m sui reconogutz Qu'eu avia faih folatge! C'a totz era de salvatge , Car m'era de chan recrezutz ! Et on eu plus estera mutz, Mais feira de mon damnatge. A tal domna m'era rendutz C'anc no.m amet de coratge, E sui m'en tart aperceubutz, Que trop ai faih lonc badatge. Oi mais segrai son uzatge : De cui que.m volha, serai drutz , E trametrai per tot salutz Et aurai mais cor volatge. Truans volh esser per s'amor, E cove c'ab leis aprenda! Pero no vei domneyador Que menhs de me s'i entenda. Mas bel m'es c'ab leis contenda, C'autra n'am, plus bel' e melhor, Que.m val e m'ayud' e.m socor E.m fai de s'amor esmenda. Aquesta m'a faih tan d'onor, Que platz li c'a merce.m prenda! E prec la del seu amador Que.l be que.m fara, no.m venda Ni.m fassa far lonj' atenda , Que lonc termini.m fai paor, Car no vei malvatz donador C'ab lonc respeih no.s defenda . Ma domna fo al comensar Franch'e de bela companha! E per so la dei mais lauzar Que si.m fos fer' et estranha ! Dreihz es que domna s'afranha Vas celui qui a cor d'amar. Qui trop fai son amic preyar, Dreihz es c'amics li sofranha. Domna, pensem del enjanar Lauzengers, cui Deus contranha, Que tan com om lor pot emblar De joi, aitan s'en gazanha. E que ja us no s'en planha Loncs tems pot nostr' amors durar, Sol can locs er, volham parlar, E can locs non er, remanha. Deu lau encara sai chantar, Mal grat n'aya na Dous-Esgar E cil a cui s'acompanha . Fis-Jois, ges no.us posc oblidar, Ans vos am e.us volh e.us tenh char, Car m'etz de bela companha . |
Play the original melody
Can't hear anything? Click here to download the original melody (MIDI).