prosody | miscellaneous |
Can la verz folha s'espan E par flors blanch' el ramel, Per lo douz chan del auzel Se vai mos cors alegran. Lancan ve.ls arbres florir Et au.l rossinhol chantar , Adonc deu.s ben alegrar Qui bon' amor sap chauzir. Mas eu n'ai una chauzida Per qu'eu sui cortes e gais. E se tuih el mon garan Desoz la chapa del cel Eron en un sol tropel, For d'una non ai talan. Mai d'aquesta no.m cossir, Que.l jorn me fai sospirar E la noih no posc pauzar Ni.m pren talans de dormir, Tan es grail' et eschafida, Ab cor franc e dihz verais. S'eu fos a lei destinan, E for'eu dinz d'un chastel Que.l jorn manges un morsel, Lai viuria sens afan, Se.m don'aisso qu'eu dezir De be far se deu penar, Car se.m ten en lonc pensar, No posc viure ni morir. Ar eslonh en breu ma vida, Si com ja de mort me trais |