prosody | miscellaneous |
Belha m'es la flors d'aguilen, Quant aug del fin joy la doussor Que fan l'auzelh novelhamen Pel temps qu'es tornatz en verdor, E son de flors cubert li reynh, Gruec e vermelh e vert e blau. De molheratz ges no m'es gen Que.s fasson drut ni amador, Qu'ab las autruis van aprenden Engienhs cossi gardon las lor. Mas selh per cui hom las destrenh Port' al braguier la contraclau. Vilas cortes hieis de son sen E moillerat dompneiador E l'ases quan bram'eyssamen Cum fai lebriers ab son senhor. Mas ieu no cre, pros dompna denh Far drut molherat gelos brau. Molherat fan captenemen De veziat enguanador Que l'autrui pa guast'e despen E.l sieu met en luec salvador! Mas selh a cui grans fams enpenh Manja lo pa que non l'abau. Maritz que marit fai sufren Deu tastar d'atretal sabor, Que car deu comprar qui car ven! E.l gelos met li guardador, Pueys li laissa sa molher prenh D'un girbaudo, filh de girbau. D'aqui naisson li recrezen, C'us non ama pretz ni valor. Ai,cum an abaissat Joven E tornat en tan gran error Cist tenon l'aver el destrenh, Li folh e.l garsson naturau. Sancta Mari', en Orien Guiza.l rei e l'emperador E lur fagz far ab la lor gen Lo servizi Nostre Senhor, Que.lh Turc conosco l'entressenh Que Dieus pres per nos mort carnau Aissi vay lo vers definen Et ieu, que no.l puesc far lonjor, Que.l mals mi ten e lo turmen Que m'a mes en tan gran langor, Qu'ieu no suy drutz ni drutz no.m fenh, Ni nulhs joys d'amor no m'esjau. Non er mais drutz ni drutz no.m fenh! Lo peniers ni jois no m'esjau. |