prosody | miscellaneous |
A, senhors, qui so cuges Del segle qu'aissi baysses Lo dreyt torna daus l'envers. Si l'an pres, no.s pot levar. Ben o feira qui.l tornes El luec on que sol estar Sist lengua forquat engres Lo trastornon tot ades E so.s partit del cofes Per amor del tort jutjar. Aquest es l'alberc e.l ses On fan lur mul establar. Selh qui plus gent sap mentir Es ben segurs de garnir D'escarlat'ab vert vestir Et esperos ab sotlar. Mai lor vey deniers offrir Que a negun de l'autar. Mas fezautat fan carzir, Quar no volon lo ver dir Tant si fizon en l'auzir De caitius desheretar. No.s pot a longas jauzir De tort qui no.l vol layssar. Lengua forquat traversan, Si.l metetz deniers denan, Far vos a de gossa can E d'eyssa guiza levar Lo dia tro l'endeman, Tan son savi del mesclar. Si.l cujatz el ponh tener E.l avetz dat vostr'aver, Elh o fara assaber A l'autre que.l volra dar, Per so que sapcha tener Lo tort contra.l dreg bayssar. Lengua forquat de mal lim, Ves totas partz avetz crim, Gent payssetz vostre noyrim, Quar sabetz l'engan mesclar, E conoyssetz ters e prim Al penre et al donar. Lengua forcatz, becx agutz, Quan totz lo plaitz es vencutz E lor digz que di aunitz : . . . . . . . . . . . . . Ven los ab peira batutz Et an pro que consirar. Lengua forcat massador, Aquist fals escoutador, Que fan per autrui honor Las companhas ajustar, Quals qu'en perda sa valor Lo caitius an pa sercar Lengua forcat son pejor Que Judas qu'a trait son senhor, Que ri d'aquo c'autre plor, E fan la lei cambiar. Semblan faun de bufador Que porta lo brezador Que pot lo bres eforzar. |