| |
|||
| prosody | miscellaneous |
Bel m'es lai latz la fontana Erba vertz e chant de rana, Com s'obrei Pel sablei Tota nueit fors a l'aurei, E.l rossinhol mou son chant Sotz la fueilla el vergant. Sotz la flor m'agrada Dous'amor privada. Dona es vas drut trefana De s'amor, pos tres n'apana! Estra lei N'i son trei. Mas ab son marit l'autrei Un amic cortes prezant. E si plus n'i vai sercant, Es desleialada E puta provada. Mas si.l drutz premers l'enguana - enguans, si floris, non grana - Lai felnei Ses mercei, Mas ben gart, no s'ensorde. Qui s'amigua vai trichant, Trichatz deu anar muzant. Amigu'a trichada, Pueis:bada, fols, bada Be.m det Dieus bon'escarida D'amor, si.m fos ben aizida. Lai manei E dompnei! Non es hom que meils estei. Ges non ai mon cor voiant D'amor, quan m'en vauc prezant Per na Dezirada, Mas trop m'es lunhada. Tant m'es grail'e grass'e plana Sotz la camiza ransana, Quan la vei, Fe que.us dei, Ges no tenc envei'al rei Ni a comte tan ni quant, C'asatz fauc meils mon talant, Quan l'ai despoillada Sotz cortin'obrada. En autr'amistat propdana M'amor mis, que.m fo dolsana Ans l'amnei Que.m sordei, Mas la meiller no.m vairei L'esparviers ab bel semblant Va del pueg ves leis volant: La longua trencada, Pren lai sa volada. En breu m'es com fils de lana Lo fortz fres e la capsana, Qui que.s grei, So.us autrei, Tota.l rengua ab correi. C'aisi vauc entrebescant Los motz e.l so afinant: Lengu'entrebescada Es en la baizada. |