Main PageTroubadours' ListingMore Works by Bernart Marti

The prosody guide is available as a book. Click here for details.

D'entier vers far ieu non pes
Ni ges de frag non faria!
E si fatz vers tota via,
En l'an un o dos o tres!
Et on plus sion asses,
Entier ni frag no so mia.

Aisso non creyrey ieu ges
Que lunh:s vers de leujairia,
Don creys peccatz e follia,
Per dreg nom entier agues.
. . . . . . . . . . . . . . . .
Qu'entier denant non faria.

E so quez entier non es
Ni anc no fo, cum poiria
Fols hom leu so cujaria.
Que chans melhs entrebesques :
Qu'om de vanetat fezes,
Entiers ni fragz non seria.

Foudat fai e nescies
Qui vers fai de truandia.
Pessa qu'entiers ni fragz sia
Que chanso ni sirventes
Ni stribot ni arlotes
Non es, mas quan lichairia.

Selh, qui faulas di - faul'es
Enteiramen lecharia,
Si qu'om no s'enganaria -
Qu'entiers e sals remazes
Non pot, que sa falsa fes
Lo ten fat en s'aurania.

E quan canorgues si mes
Pey d'Alvernh'en canongia,
A Dieu per que.s prometia
Entiers que pueys si fraysses
Quar si feys fols joglares,
Per que l'entier pretz cambia.

E cujas qu'a Dieu non pes
Chans d'aital ufanaria
E doncx quo mals li plairia
Mas no.l play, que, si.l plagues,
Tant auria.l mals conques
Qu'ab ben egal partiria.

Si peccatz era merces,
Messonja vertatz parria.
E qui en sa joglaria
Ment, e mentir non es bes.
Donc es mals, e non es res
Mas despieigz e vilania.

Fols vanars es pagezes
E grans laus es pagezia
E fols mentirs es bauzia,
Et hom de dir ufanes
Es plus vilas que pages
Segon romans e clercia.

E selh no par ges cortes
Qui.s lauza ni.s glorifia,
Quar eys Dieus nos anuncia:
Qui trop s'yssaussa, menr'es
Bayssan, e selh levatz es
Qui segon so s'umilia.

So dis qu'om si conogues,
E qui aisso gardaria,
Ja no.s sobrelauzaria,
Que sobrelaus follesc es,
E pareys be, si pros es,
Ja el mezeis non o dia.

Pro sap e ben es apres
Qui so fay que ben estia,
Et es mager cortezia
Que sos laus es pels paes
Per autruy que per el mes,
Qu'ab pobol par vilania.

De far sos novelhs e fres,
So es bella maestria,
E qui belhs motz lass'e lia
De belh'art s'es entremes!
Mas non cove q'us disses
Que de totz n'a senhoria.

En pauc d'or'es hom mespres,
Quan ditz mais que non deuria.