Main PageTroubadours' ListingMore Works by Bernart Marti

The prosody guide is available as a book. Click here for details.

Farai un vers ab son novelh
E vuelh m'en a totz querelar,
Qu'a penas trobi qui m'apelh
Ni sol mi denhe l'uelh virar.
Trobat m'an nesci e fadelh,
Quar no sai l'aver ajustar.

Un non vey tan ric ni tan belh,
No.s camge de tot son afar,
Quan trop joves pert son capdelh
Per qui deuria melhurar,
Que plus lo plumon qu'un auzelh,
Quan lo vezon tot sol estar.

No.m puesc mudar que no.m querelh,
Que la folhia vey sobrar.
Non truep qui ab si m'aparelh
Ni.m fassa ben ni.m vuell'amar
Ni de nulha ren m'acosselh
Ni.m essenh quon o deia far.

Si duerm trop, non er qui.m revelh,
Ans si penran tug a gabar!
E si stau tot jorn al solelh,
Pauc trobarai, m'an covidar:
Ja negus hom d'amic no.s velh,
Si non a poder de donar

Greu er nulhs hom aperceubutz
Qui non a mas se a mandar.
Si's savis, er per folh tengutz,
Si'n aver no.l ve hom pojar.
A tot despieg es cazegutz
Cuy ave autruy agachar.

Ja non er pros ni mantengutz
Qui non sap aver amassar,
Qu'ar non es dregz reconogutz!
Mais fors'a qui mais pot panar,
E.l paupres es ses colp vencutz,
Que no.s pot cubrir ni tornar.

Cuy siey amic falhon del tot,
Ben seri'ops a perforsar
Que non estes tostemps el lot,
Ans vis si poiria levar,
Que per fraire ni per nebot
No.s deu negus hom refizar.

Mas so que hom a, sobretot
Cove per mezura menar.
Si non o fai e.ss en escot,
L'autruy l'ave segr'e cassar.
Ab so ieu sembli be la cot
Que non talh'e fa.l fer talhar:

Aquo de qu'ieu non say un mot
Cugi ad autruy ensenhar.