home page ?


Ronci, c. ves m’aves faih penedir
Quar anc compriei vostre cors flac malvais,
Qu'ieus vei fortment dels pes entreferir
Et cascun jorn maigriar ades mais ;
E pos herba qu'ie-us don no-us dona grais
Nie-us n'engruissatz nie-us n'aplana-s l'esquina,
Ieu vos vendrai, vo seres gras et guais,
Mens de captal, ans qu'ieu n'aya tayna.

Amicx Bertran Carbonel, ie-us aug dir
Que ses manjar fort petit fan li cays
E mens las dens, mais vos puesc guarentir
Que si-m davas d'erba la nueh des fays,
Ses sivada non seri'a Doays
Denfra dos ans: non aurai forsa fina,
Plus qu'om ses pan fortz ni sas non er mays!
Vieu ses ordi, e mostr'o ben m'orina.

N'aul rocinas flac, ieu vos aug mentir,
Que Maria, Aynes et Alazais,
Mas sirventas, non t'en podes esdir,
Venon la nueh per tu servir, pucnais:
Que queres plus l'un'escoba ton nays,
L'autra fay lum, l'autra ti fay jasina,
Pueis ti donan, croza-tort, flac savais,
De sivada ben lo cart d'un'esmina.

Als nesis par que sabon gen cubrir
Las mesonjas, que no i aja biais!
Bertran, per cert puesc jurar e plevir
Que vers non es, ni homs non iest verais:
Ben as fama que plus lials non pais,
Mas qui ho dis ben non sen ta traina,
Que sayns n'a una viella carcais
Que li fas dir ' ay ay, dona mesquina'.

Per Dieus, mortz iest, res non ti pot guarir,
Fals rocinas, c'ueymais ti don mastais
Ni rialguar, e-us o er obs brugir:
Non fasses ja, que si mos cors s'irais,
Ja-l sotveguiers ni-l juges del palais
Non ti valran, ni vezis ni vezina,
C'am mon bordon ades mort non ti lays,
Pos de mentir ta golasa non fina.

Tan gran fam ay que mais vuell trop morir,
Bertran, qu'estar en dolor ni-n pantays,
E pos ti plai, pre Dieu, vuellas m'aucir,
Qu'ieu non soy ges dels monjes de Cambrais:
Mos dejunis mi dona gran abays.
Ai, sen Romieu, s'iu fos bona gallina,
De vos l'agra. anc null jorn non mi plais,
Seinher, de vos, tant aves valor fina.

Si per l'amor non fos dona Saurina
Que mi pregua que li ti prest, pugnais,
Non mi dera de tu mais atayna.

D'aiso ay gaug, car d'aqui a Mesina
Plus pros domna ni plus valens non pais,
E non en giet duquesa ni regina.