| |
|||
| prosody | miscellaneous |
Et atruep ne d'autres fols vers Que an tan d'ipocrizia C'om non conoys lor bauzia Ni-ls enjans don lor ven l'avers. Ay, fals clergue, e cals devers Es fassas tan gran folia E que-l be mostres tot dia Es be fols doncx vostres volers. Bos pastres non deu anc prear Sas fedas per nulh afaire, E que vos o vulhatz faire, Qu'es pastor, feratz a cremar. Qui ben vol de Dieu prezicar Non deu esser fols ventayre, Car fols es le prezicayre Que ben ditz e vuelha mal far, E fols si no-l destrenh temers, E fols qui-s fenh que bos sia, E fols sel que Dieus oblia, E fols qui sec sos vas plazers. On que an, le devis poders Sap cals clercx fay bona via, E sap be la tricharia Dels fals ples de totz mals sabers, E sap com per otracujar An portels tras lor repaire, Per on intran li cofraire Vergonhos, can van cofessar. Lo mal qu'ilh fan deu hom blasmar, E-l ben grazir e retraire: Ufana non lor play gayre, Que aiso lor puesc yeu lauzar, Ni ricx manjars ni ricx jazers Ni erguelh ni feunia! Mas empero totavia Fan so c'a Dieus es desplazers. A Selon, on es fis pretz vers, Sirventes, e cortezia, Al mieu car senhor t'envi a Dir qu'ie-l prec que-s gar de fals clers, E qu'ieu soi sieus ses bauzia Per far e dir totz sos plazers. |