Rassa, tant creis e mont'e poia
Cella q'es de totz engans voia
Sos pretz a las autras enoia!
C'una non i a c'alre.i voia.
Qe.l vezers de sa beltat loia
Los pros a sos ops, cui que doia.
Qe.l plus conoissen e.il meillor
Mantenran ades sa lauzor,
E la tenont per la genssor,
Qu'il sap far tan entier'honor:
Non vol mas un sol preiador.

Rassa, als rics es orgoillosa,
Et a gran sen a lei de tosa,
Qui non vol Peitieus ni Tolosa
Ni Bretaigna ni Serragosa.
Anz es de pretz tant enveiosa
Q'alz pros paubres es amorosa.
Pois m'a pres per chastiador
Prec la qu'il tengua car s'amor,
Et am mais un pro vavassor
Q'un comt'o duc galiador
Que la tengues a desonor.

Rassa, dompna q'es fresc'e fina,
Coinda e gaia e mesquina,
Pel saur ab color de robina,
Blanca pel col cum flors d'espina,
Coide mol ab dura tetina,
E sembla conil de l'esquina,
E a fina, fresca color,
Ab bon pretz et ab gran lauzor,
Leu podon triar l'i meillor
Aquil qe.is fant conoissedor
De mi, vas cal part q'ieu ador.

Rassa, rics hom que ren non dona,
Ni acuoill ni met ni non sona,
E qui senes tort ochaisona,
E, qui merce.il qier, non perdona,
M'enoia, e tota persona
Qe servizi non guizerdona.
E li ric home cassador
M'enoiont, e.il buzatador,
Gaban de volada d'austor!
Ni ja mais d'armas ni d'amor
Non parlaran mot entre lor.

Rassa, aisso.us prec que vos plassa:
Rics hom que de gerra no.is lassa,
Ni no s'en laissa per menassa,
Tro c'om se lais que mal no.il fassa,
Val mais que ribieira ni cassa,
Que bon pretz n'acuoill e n'amassa.
Maurin e n'Agar, son seignor,
Ten hom per bon envazidor.
E.l vescoms defenda s'onor,
E.l coms l'apelle per vigor,
E veiam l'ades al pascor.

Marinier, vos avetz honor,
E nos avem camiat senhor
Bon gerrier per torneiador.
E prec a.n Golfier de la Tor
Mos chantars no.il fassa paor.

Papiol, mon chantar recor
En la cort mon mal Belh Senhor.