Mon chan fenis ab dol et ab maltraire
Per totz temps mais e.l tenc per romazut,
Car ma rason e mon gaug ai perdut
E.l meillor rei que anc nasqes de maire,
Larc e gen parlan
E gen cavalgan,
De bella faiso
E d'umil senblan
Per far grans honors.
Tant cre que.m destreingna
Lo dols que m'esteingna,
Car en vauc parlan.
A Dieu lo coman,
Qe.l met'en loc San Joan.

Reis dels cortes e dels pros emperaire
Foratz, seingner, si acses mais vescut!
Que reis joves avias nom agut
E de joven eras capdels e paire.
Et auberc e bran
E bel bocaran,
Elm e gonfanon
E perpon e pan
E jois et amors
Non an que.ls manteingna
Ni qui ja.ls reveingna.
Mas lai vos sigran,
C'ab vos s'en iran
E tut ric faig benestan.

Gent acuillir e donar ses cor vaire
E bel respos e ben sias vengut
E gran hostal pagat e gen tengut,
Dons e garnirs et estar ses tort faire,
Manjar ab mazan
De viol'e de chan
E maint compaingnon
Ardit e poissan
De totz los meillors --
Tot voill c'om o teingna,
Que ren non reteingna
Al segle truan
Pel malastruc an
Que nos mostret bel senblan.

Seingner, qu'en vos non era res a ffaire,
Qe totz lo mons vos avi'elegut
Pel meillor rei que anc portet escut
E.l plus ardit e.l meillor torneiaire.
Deus lo temps Rolan
De llai ni denan
Non vi hom tan pro
Ni tan guerreian,
Ni don sa lausors
Tant pel mon s'enpreingna
Ne si llo reveingna,
Ni que l'an sercan
Per tot agaran
Del Nill tro.l soleill colgan.

Seingner, per vos mi voill de joi estraire,
E tut aqil que.us avion vezut
Devon estar per vos irat e mut,
-- e ja mais jois la ira no m'esclaire --
Breton et Irlan,
Engles e Norman,
Guian e Gasco.
E Peitou a dan
E.l Maines e Tors.
Fransa tro Compeingna
De plorar no.s teingna,
E Flandres de Gan
D'aqui a Guizan.
Ploron neis li Aleman.

Loirenc e Braiman
Qan torneiaran
Auran dol quan no.us veiran.

No pretz un besan
Ni.l colp d'un'aglan
Lo mon, ni cels que.i estan,
Per la mort pesan
Del bon rei presan
On tuit devem aver dan.