Ges no me desconort,
S'ieu ai perdut,
Que non chan e.m deport
E no m'aiut
Cum cobres Autafort,
Q'eu ai perdut,
Del seignor de Monfort
Car l'a volgut.
E puois tot merceian
Li sui vengutz denan,
E.l coms en perdonan
M'a receubut baisan,
Eu no.i dei aver dan,
Que qe.m fezes antan,
Ni lausengier non blan.

Vas me.is son perjurat
Doi palaizin
E tuich li vescomtat
De Limozin,
E li doi penchenat
Engolmezin,
E li trei comte fat
Peiregozin,
E.n Centoils e.n Gasto
E.n Raimons d'Avigno,
E lo coms de Digo
Ab lo comte breto,
E maing autre baro
Mi feiron fermazo
C'anc pois no.m tengron pro.

Qan pro no.m ten, amic
Am per engal
Cum fatz mon enemic
Que no.m fai mal.
Q'en un mostier antic
De Saint Marsal
Mi jureron maint ric
Sobr'un messal.
Tals me plevic sa fe
Non fezes patz ses me,
C'anc pois no m'en tenc re,
E s'acordet ab se!
So vos pliu per ma fe.
E non o feiron be
Car feiront patz ses me.

Si.l coms m'es avinens
E non avars,
Mout li serai valens
En sos afars,
E fis cum us argens,
Amics e clars.
E.l coms fassa los sens
Que fai la mars:
Si res i chai de pro
Vol ben c'ab lieis esto,
E so que no.ill es bo
Geta fors el sablo!
Aital voil de baro
Que teigna son perdo
E, si tol, que puois do.

Lo comte vuoill pregar
Q'a ma maiso
Que la.m prest per gardar,
O qe la.m do!
Qe tant mi son avar
Aquist baro
C'ab lor non puosc estar
Ses contenso.
Ara mi pot cobrar

Et eu vas lui tornar,
E servir et honrar!
E non o volgi far
Tro c'al desamparar
Sui venguz de n'Aimar.

Ma bell'esmendas gar
Hueimais de sordeiar,
Qe ja per meilhurar
Non la cal trebailhar.
Q'el mon non sai sa par
De joi ni de parllar
Ni de bell donneiar.

Dompna ab cor avar
De prometr'e de dar,
Pois no.m volguetz colgar
Donassetz m'un baisar!
C'aissi.m podetz ric far
E mon dan restaurar,
Si Dieus e Sains m'anpar.

Papiol, mon chantar
Vai a midonz comtar:
Per amor d'en Aymar
Mi lais de gerreiar