Rassa, mes si son primier
En la fin que ant parlada
Li seignor e.il mainadier
E.il baron de l'encontrada.
E s'il fant vas vos estrada
Et eu cal mal vos en mier,
Que terra non ai cobrada

Chascus mi laissa derrier
Qan m'ant mes en la mesclada
Li gentil e li lainier!
Pois q'ant ma terr'adermada
Et arsa et abrasada
Dizont cill de Colombier
Q'en prenda dreich, si m'agrada.

Nos em tal trenta gerrier
Chascus ha capa traucada,
Tuich seignor e parsonier
Per cor de gerra mesclada,
C'anc no.n cobrem dinairada!
Anz qand a als colps mestier
Ant lor coreilla prestada.

Oimais seran ric portier,
Que tenrant porta serrada,
E sabran arbalestier
Q'es la patz en l'encontrada,
C'om non lor dara soudada!
Doncs auran chan e lebrier
Del comte s'amor privada.

Austor e falcon gruier,
Corn e tabors encuirada,
Li braquet e.il liamier,
Arc ab saieta barbada,
Gannacha larga folrada,
Et osas de Salavier
Serant mais de lor mainada.

Sercat ai de Monpeslier
Tro lai part la mar salada,
Que non trob baron entier
C'aia proez' acabada
Q'el mieich non sia oscada
O fraicha da l'un cartier!
Ni mais us m'en agrada.

Bella dompn', a Dieu vos qier,
Qe tant vos ai desirada
Qe mort m'ant li desirier,
Avinens dompna prezada.
Na Tenpre, .l gensser m'agrada
Qe m'a per son messatgier
Del mon la razon celada.

Papiol, ten drech sentier,
Non temas ven ni gelada.

Digas mi a mon Rainer
Qe sa proesa m'agrada.