Ges de far sirventes no.m tartz,
Anz lo fauc senes totz affans.
Tant es sotils mos geins e m'artz
Que mes m'en sui en tal enans
E s'ai tant de sort
Qe ve.us m'en estort,
Qe comte ni rei
No.m forssan ni grei.

E pois lo reis e.l coms Richartz
M'ant perdonat lor maltalans,
Jamais n'Azemars ni n'Amblarz
No.m don tregas ni.n Talairans.
Ni ja d'Autafort
No.il laissarai ort.
Qui.s vol m'en gerrei
Pois aver lo dei

Tant sui fortz devas totas partz
Q'en mi resta de gerra.l pans.
Pustella en l'huoill qui m'en partz
Si tot m'o comenssiei enans,
Patz no.m fai conort.
Ab gerra m'acort,
Q'ieu non teing ni crei
Negun 'autra lei.

E no.i gart diluns ni dimartz
Ni setmanas, ni mes, ni ans
Ni.m lais per abril ni per martz,
Q'ieu non tracte cum veigna dans
A celz qe.m fant tort.
Mas ja per nuill sort
Non conquerran trei
Lo pretz d'un correi

Qui que fassa de bos issartz,
Eu me sui totz temps mes en grans
Cum puosc'aver cairels e dartz,
Elms et aubercs, cavals e brans.
C'ab aisso.m conort
E.m teing a deport -
Gerra e tornei,
Donar e dompnei.

Mos parsoniers es tant gaillartz
Q'el vol la terra mos enfans,
Et eu la.il vuoill dar, tant sui gartz.
Pois diran tuich, flacs en Bertrans.
Mas sal tot lo tort,
Cre q'a malvatz port
Venra, so.us autrei,
Anz c'ab mi plaidei.

No.m cal d'Autafort
Mais far dreich ni tort,
Qe.l jutgamen crei
Mon seignor, lo rei.