Tortz e gerras e joi d'amor
Mi solion far esbaudir
E tener gai e cantador,
Tro per lieis cui dei obezir
Mi fo mos chantars devedatz.
E tot en lei
Ve.us cum mos chans s'es torneiatz.

Era sui tornatz en amor,
E veiretz anar e venir
Chanssos, pois a la bellazor
Plaz que deia mon chant sofrir.
E m'onranza s'es acordatz
Sos cors a drei,
E non a negun dels comtatz.

Del pauc rei de Terra Menor
Mi platz, car si vol enantir.
C'oimais lo tenran per seignor
Cill que deuran son fieu servir.
Pois venc a lor affars auratz,
Aras estei
E cobre sos dreitz daus totz latz.

No.m tengatz per envazidor
S'ieu vuoill c'us rics l'autre azir!
Qe mieills s'en poiran vavassor
E chastellan de lor gauzir.
Car plus es francs, larcs e privatz,
Fe qu'eu vos dei,
Rics hom ab gerra qe ab patz.

E.l volpill de l'emperador
Volian Lombart envazir!
E ja non laisson per paor
Sobre de Cremona bastir,
Que.l coms Raimons es sai honratz
Car ab lo rei
S'es novellamen afiatz.

Ben sai que li malparlador,
Car vuoill de lor gerra ver dir,
M'en appellarant sofridor
Car m'i lais forssar e baillir.
Q'els dons que mos frair m'a juratz
E fag autrei
Vol retener l'autra meitatz.

Pois non volon dreich ni amor
Miei fraire ni mos plaitz sofrir,
Ges per lezidors d'obrador,
S'ieu m'en podia revestir,
Non dei esser malrazonatz.
Qu'il fant plaidei
Maintas vetz c'om no.ls n'a preiatz.

Mas eu hai tant enseignador
Non sai, per Crist, lo mieils chausir!
Qan eu prend e tuoill sa ricor
D'aquels qe no.m laisson garir,
Dizon que trop me sui cochatz.
Car non gerrei,
Ditz hom aras q'ieu sui malvatz.

Papiol, e tu vai viatz
Al joven rei!
Diras que trop dormir no.m platz.

En Oc e No ama mais patz
Ab Felip, crei,
Que.l frair Joans deseretatz.