Belh m'es quan vey camjar lo senhoratge,
E.l viel laixan als joves lurs maizos --
E quascus pot giquir a son linhatge
Aitans d'efans que l'us puesc'esser pros --
Ladoncs m'es belh, qu'el segle renovelh
Mielhs qe per flor ni per chantar d'auzelh.
E qui dona ni senhor pot camjar,
Vielh per jove, ben deu renovelar.

Vielha la tenc, dona, pus c'a pel laya,
Et es vielha quan cavalier non a.
Vielha la tenc si de dos drutz s'apaya,
Et es vielha si avols hom lo.il fa.
Vielha la tenc s'ama dins son castelh,
Ez es vieilha qan lh'a ops de fachell.
Vieilha la tenc pos l'enueion juglar,
Et es vielha que trop vuelha parlar.

Jov'es dona que sap honrar paratge,
Et es joves per bos fagz - quan los fa.
Joves se te quan a adreg coratge
E vas bon pretz avol mestier non a!
Jove se te quan guarda son cors belh
Et es joves dona quan be.s capdelh.
Jove se te quan no.y cal devinar,
Qu'ab belh jovent se guart de mal estar.

Joves es hom que lo sieu ben enguatge,
Et es joves quan es ben sofraitos.
Joves se te quan pro.l costa ostatge,
Et es joves quan fa estraguatz dos.
Joves se te quan art l'arqu'e.l vaixelh
E fai estorn e vouta e sembelh.
Jove se te quan li plai domneyar
Et es joves quan ben l'aman juglar.

Vielhs es ricx hom quan re no met en gatge,
E li sobra blatz e vis e bacos.
Per vielh lo tenc quan liur'huous e fromatge
A jorn carnal si e sos companhos,
Per vielh quan vest capa sobre mantelh
E vielh si a caval qu'om sieu apelh,
Per vielh quan un jor no.l plai domneyar
E vielh si pot guandir ses baratar.

Mon sirventesc port e vielh e novelh,
Arnaut juglar, a Richart, que.l capdelh!
E ja thezaur vielh no vuelh'amassar,
Qu'ab thezaur jove pot pretz guazanhar.