Main PageTroubadours' ListingMore Works by Bertran de Born

The prosody guide is available as a book. Click here for details.

Mailolin, joglar malastruc,
Pos acoindat m'a hom de vos
E mi venes qerre chansos,
En talent ai q'ie·us en vailha.
Qar iest avols e semblas bos,
Mieills fora foses campios
Qe viure d'autrui corailha.

Aital solatz m'aves faissuc
Q'autr'om en seri'enuios;
Ez es plus nescis qe montos,
E canta plus clar li grailha.
Porc q'om regarda millargos
Fai meilhor escoutar qe vos
O nafrat qan hom lo tailha.

Qi·us apellava paoruc,
Semblaria qe vers no fos:
Qar iest granz e joves e tos,
Fas semblan q'aias corailha,
Mas lai on lebres es leos
Vos est vollpills e nuailhos,
Flacs ses tota defensailha.

Dedintz iest plus caus d'un saüc
Ez a·s maior cor uns soiros,
Mas le feges et le polmos
Es grans sotz la cabeçailha.
Ez iest de matin someilhos,
Qe, qi·us sona un mot o dos,
Fas semblan qe no·s en cailha.

Mal vos tenen per asertuc
D'armas en la ost dels basclos,
Qe un non hi a dels garços
Qe denan vos non assailha.
Si·s defendian ab melos
Cascus intreri' anz qe vos
S'avias elm e ventailha.

.............................
Lai on sentes raustir montos
Vos fas de l'intrar plus cochos
Q'al pal ni a la serrailha.
E non es tan grans le roinhos
Q'en un sol morsell o en dos
Non l'enpasses qi·l vos tailha.

.............................
Raimon de Planell, qar es pros,
Vueilh q'auja·l sirventes de vos;
E·l sons iesca·n ab trebailha;
Car sordei chantatz qe paos
E gavainhatz los motz e·ls sos,
Per q'es fols qi los vos bailha.