| prosody | miscellaneous |
Molt m'es descendre car col De guerra far ab castel E car assaut ni cembel Non vim mais aura d'un an E teing m'o a grand affan Car il n'estan per paor E nos autri per s'amor Del seingnor de Molïerna. Que·ls aguisa e·ls esmol E·ls toca coma coutel, Lo seingner que ten Bordel, Mas trop son espes denan E moz devas lo trenchan; E plus leial d'un prior Merce de l'esmoledor Tuit venran a vita eterna. Ja·N Berlai de Mostairol Ni·N Guillem de Monmaurel Non agren cor tan isnel Com nostre baro cada an Can ven a l'estiu intran, Puois quan intr'a la fredor, L'ardit torna en paor Can lo clars temps s'abüerna. Del seingnor de Mirandol Qui ten Crueissa e Martel Non cre ogan se revel Troque veia que faran Frances que van menasan Et non son tan gabador Ben non atendo·l pascor Car oi mais plou et inverna. Aragones fan gran dol, Catalan e cil d'Urgel, Car non an qui los capdel Mas un seignor flac e gran Tal que·s lausa en chantan E vol mais diners c'onor. E pendet son ansessor Per que·s destrui et enferna. Lai vir on la denz me dol Vas cella de cui m'es bel Qu'eu la repti e l'apel De traïcion e d'engan, Car per son leugier talan Soffre que·l fals feinnedor S'anon feinnen de s'amor De leis que bon pretz governa. Eu sai un austor tersol Mudat, q'anc non pres auzel, Franc e cortes et isnel, Ab cui eu m'apel Tristan; E tot per aital semblan A·m pres per entendedor Et a·m dat mais de ricor Que s'era reis de Palerna. Tristan, per la vostr'amor, Me veiran torneiador En Pitau, qui qe·m n'esqerna. Mas la reïna d'amor M'a pres per entendedor. Ben puosc far cinc et ill terna. |