Main PageTroubadours' ListingMore Works by Bertran de Born

The prosody guide is available as a book. Click here for details.

Be·m platz lo gais temps de pascor,
Que fai foillas e flors venir;
E platz mi qand auch la baudor
Dels auzels que fant retentir
Lor chan per lo boscatge;
E plaz me qand vei per los pratz
Tendas e pavaillons fermatz;
Et ai gran alegratge,
Qan vei per campaignas rengatz
Cavalliers e cavals armatz.

E platz mi qan li corredor
Fant las gens e l'aver fugir,
E plaz mi, qan vei apres lor
Gran ren d'armatz ensems venir;
E platz me e mon coratge,
Qand vei fortz chastels assetgatz
E·ls barris rotz et esfondratz,
E vei l'ost el ribatge
Q'es tot entorn claus de fossatz,
Ab lissas de fortz pals serratz.

Et atressi·m platz de seignor
Qand es primiers a l'envazir
En caval armatz, ses temor,
C'aissi fai los sieus enardir
Ab valen vassalatge.
E pois que l'estorns es mesclatz,
Chascus deu esser acesmatz
E segre·l d'agradatge,
Que nuills hom non es ren prezatz
Troq'a mains colps pres e donatz.

Massas e brans, elms de color,
Escutz trancar e desgarnir
Veirem a l'intrar de l'estor,
E maint vassal essems ferir,
Don anaran aratge
Cavaill dels mortz e dels nafratz.
E qand er en l'estor intratz,
Chascus hom de paratge
Non pens mas d'asclar caps e bratz,
Car mais val mortz qe vius sobratz.

E·us dic qe tant no m'a sabor
Manjar ni beure ni dormir
Cuma qand auch cridar: "A lor!"
D'ambas las partz et auch bruïr
Cavals voitz per l'ombratge,
Et auch cridar, "Aidatz! Aidatz!"
E vei cazer per los fossatz
Paucs e grans per l'erbatge
E vei los mortz qe pels costatz
Ant los tronchos ab los cendatz.

Pros comtessa, per la meillor
C'anc se mires ni mais se mir
Vos ten hom e per la genssor
Dompna del mon, segon q'auch dir.
Biatritz d'aut lignatge,
Bona dona en ditz et en fatz,
Fons lai on sorz tota beutatz,
Bella ses maestratge,
Vostre rics pretz es tant poiatz
Qe sobre totz es enansatz.

Baron, metetz en gatge
Castels e vilas e ciutatz
Enans q'usqecs no·us gerreiatz.