home page ?


A totz dic que ja mais non voil
Viure, ni ja joi non aurai
Tan gran con lo jorn q'ieu morrai.
Pos sai hai mon Rassa perdut,
Lai lo volri'aver cobrat.
Ai segner! Car ses vos remain,
Totz temps n'aurai lo cor irat
Duscha que vos aia segut.

Lo cors mi remet e li oil
Per l'aiga qi d'aval en vai
Per la dura dolor q'ieu trai,
Segner, pos m'agron mentagut
C'ab se vos avia menat
Lo Segner cui servon li sain
Cui pregem tuit per sa bontat
que ab se vos guit a salut.

Verais coms, Alixandres voil
Que·us fassa compagnia lai,
Ogiers e Raols de Canbrai,
Rolantz ab tota sa vertut
Ab Olivier, son vezin, At,
Estols, Naimes et Oristain,
Guillems d'Aureng'e·l plus prezat
Qe del miels del mont son crezut.

De Lerida jusq'a Vernoil
Ni de los Alps a Roncisvai,
Ni d'outra la mar ni de zai
Non portav'anc princeps escut
Tan s'agues de bon pretz levat;
Q'em breu no·n valgra argenz estain,
Tan l'ome n'agran en plantat,
Que tornat l'avi'en menut.

S'Artus, lo segner de Cardoil
Cui Breton atendon e mai,
Agues poder qe tornes sai,
Breton i aurian perdut
E Nostre Segner gazagnat.
Si lor i tornava Galvain
Non lur auria esmendat
Qe mais non lur agues tolut.

Sa honor fara, si l'acoill
En sa cort, qar anc non hac mai
Tan ric, ni aitan bo no sai,
Ni tant ara de pres agut,
Qe so dont eron descuiat
Escïen e sobrier e main,
El reteni'a doble grat
D'aquelz qi l'avion vezut.

Prez es jos del auzor capdoil
Pel conte que tenia·l rai,
E jovenz tornatz en esmai.
Perdut an lor capdel li drut
E·il ric torneiador prezat,
Joglar e soudadier estrain
E donas lo miels ensegnat
E prestador lo plus crezut.

Lo reis dels reis, per sa vertut,
Retenga lo conte prezat,
Dont totz lo monz sospir'e plain,
Pos l'autre segle n'a ornat
Et aqust de sai dechaüt.