Main PageTroubadours' ListingMore Works by Bertran de Born

The prosody guide is available as a book. Click here for details.

S'ieu fos aissi senher e poderos
De mi mezeys, que no fos amoros,
Ni no m'agues amors el sieu poder,
Ben feira tan qu'a totz feira saber,
Del rey Felip qual dolor ab qual dan
E quals dols es quar elh be non es pros,
E quar Peytaus vai si Fransa merman.

E si Richartz pren ab lebres leos,
Qe no·y reman per plas ni per boyssos,
Enans los fay dos e dos remaner
Per sa forssa, c'us no s'auza mover;
E cuja ben penre d'aissi enan
Las grans aiglas ab los esmeirilhos,
Et ab buzacx metr'austors en soan.

E·l reys Felips cassa lay ab falcos
Los passeratz e·ls petitz auzelhos
E siey home non l'auzan dire·l ver:
Quar pauc e pauc se layssa dechazer,
Sai a·N Richart que l'a tolgut ougan
Engolesme don s'es fags poderos,
E Tolosa, qu'el te sobre deman.

E pus per sa terra non es yros,
Membre·l sa sor e·l marit ergulhos,
Que la laissa e non la vol tener
–Aquest forfaitz mi sembl'a desplazer–
E tot ades que s'en vay perjuran,
Que·l reys Navars l'a sai dat per espos
A sa filha, per qu'el ant'a pus gran.

E s'aissi pert sos dregz entre qu'es tos,
Lay quant er veilhs en sera vergonhos.
Ni ja Frances non aian bon esper:
Quar, a lor, tot qu'om sol sai tan temer
No prezon re, lur dig ni lur deman
Sai vas Peytau, enans s'en fan janglos
Quan son ensems En Richartz ab Bertran.

E venran say ab las novelhas flors,
E lur bobans sera de sobr'en jos,
E ja Guasco no·i poiran pro tener
Que no·ns tollam lo Mon pres San-Sever
E Rocafort, e quan tolgut nos an,
Si qu'en Peytau sera·n nostres brandos
Gent alumnatz, si que tuit o veyran.