Nostre seingner somonis el mezeis
Totz los ardiz e.ls valens e.ls presatz!
Qu'anc mais guerra ni cocha no.l destreis,
E d'aquesta ten se fort per grevatz.
Que presa es la vera cros, e.l reis,
E.l sepulcres a de secors fraitura,
Don tuit crezem, ab leial fe segura,
Que lo sainz fuecs i deisen. c'om o ve,
Per que no.i fai nuill effortz qui so cre.

Sel que es coms e ducs e sera reis
S'es mes enan, per qu'es sos pretz doblatz.
Qu'el voll mais pretz c'om de llas doas leis,
Dels Crestians ni dels no-bateiatz.
E c'el vol pretz, a las obras pareis!
Qu'el vol tant pretz e tant bon'aventura,
Per que sos pretz creis ades e meillura.
Qu'el vol lo pretz del mal e.l pretz del ben,
E vol tant pretz c'ambedos los rete.

Aras sai eu qu'adreitz vol esser reis
Los reis Felips, que dizen qu'es crozatz,
Et anc Carles en tal pretz no s'empeis
Cum el fara, d'aiso s'es ben vanatz.