Main PageTroubadours' ListingMore Works by Bertran de Born

The prosody guide is available as a book. Click here for details.

Anc no·s poc far maior anta
Qan m'asols
Ni mi pres en dols.
E pueis ill so a enqest,
Midons ni·l plai qe m'esclava
Ni qe·m lais,
No m'es danz
Si·lls autruis enfanz
Colc'el mieu bressol
Q'ieu sui granz

Fatz cors, e pos ill t'encanta
Tu t'o cols!
E fatz i qe fols,
Que de tot joi si devest
E de pretz se cura e lava.
Per ja mais
Le bobanz
Remainha e·l mazanz,
Q'ieu o vueilh, si·s vol,
Dos aitanz

Se·l seinher de cui es Manta
E Murols
S'es de prims tersols
Tornatz. Ab qe sai non rest!
Sieus seria, si·s n'anava
Lai, Roais,
Trevaganz,
Alaps e Aranz
E fera filhol
Dels Persanz.

Vas mon Oc-e-No t'avanta,
Papiols,
Qar sieus es Bristols
E Nortzecrentz e Suest
E Londres e Titagrava
E Carais
E Roanz,
E Toars e Canz.
Pos tot a qan vol,
Sai s'eslanz.

Entre Dordoinha e Charanta
Es trop mols
So·m dis n'Auriols,
Q'enquier no·i a ren conquest.
Et er l'anta si·s suava,
Ni qe lais
Benananz
E gortz e tiranz
Cels q'amar non sol,
E poissanz.

Enaps e copas mazanta
Et orçols
D'argen e pairols,
E sec ribiera e forest,
E sai tolli'e donava!
No·s biais
Dels affanz:
Preisas e mazans,
Gerras ab tribol
L'er ennanz.

Bells-Seinher, truanz
Seres, si no·us dol
Le mieus danz.

Mariniers, enjanz
Es q'amar destol
Als amanz.