Main PageTroubadours' ListingMore Works by Bertran de Born

The prosody guide is available as a book. Click here for details.

Miei-sirventes vueilh far dels reis amdos,
Q'en brieu veirem q'aura mais cavailhiers
Del valen rei de Castella, n'Anfos,
C'aug dir qe ven e volra sodadiers.
Richarz metra a mueis e a sestiers
Aur e argen, e ten s'a benanansa
Metr'e donar, e non vol s'afiansa,
Anz vol gerra mais qe qailla esparviers.

S'amdui li rei son prou ni corajos,
En brieu veirem camps joncatz de qartiers
D'elms e d'escutz e de branz e d'arços
E de fendutz per bustz tro als braiers;
Es arage veirem anar destriers,
E per costatz e per peichz manta lansa,
E gaug e plor e dol e alegrança.
Le perdr'er granz e·l gasainhz er sobriers.

Trompas, tabors, seinheras e penos
E entreseinhs e cavals blancs e niers
Veirem en brieu, qe·l segles sera bos,
Qes hom tolra l'aver als usuriers,
E per camis non anara saumiers
Jorn afiçatz ni borjes ses duptansa,
Ni mercadiers qi venga deves França;
Anz sera rics qi tolra volontiers.

Mas se·l reis ven, ieu ai en Dieu fiansa
Q'ieu serai vius o serai per qartiers.

E si sui vius er mi grans benanansa,
E se ieu mueir er mi grans deliuriers.