Ara sai eu de pretz quals l'a plus gran
De totz aquels que.s leveron maiti:
Mesers Conratz l'a plus fin ses enjan
Que.s defen lai a Sur de Saladin
E de sa masnada croia.
Secora.l Dieus que.l socors vai tarzan.
Sols aura.l pretz que sols sofre l'affan.

Meser Conrat, a Jesu vos coman,
Q'eu fora lai a Sur de Saladi,
Mas laisei m'en quar se tarzaven tan
Li comt'e.ill duc, lli rei e li princi.
Pois vi midonz bell'e bloia
Per que s'anet mos cors aflebeian,
Q'eu fora lai, ben a pasat un an.

Seingner Conrat, eu sai dui rei qu'estan
D'aiudar vos. ara entendatz qui:
Lo reis Felips es l'uns, quar va doptan
Lo rei Richart, es el lui dopt'aissi.
Ar fos unsquecs d'elz en boia
D'en Saladin pos van de Deu gaban
Quar son crosat e d'anar mot no fan

Seingner Conrat, tot per vostr'amor chan,
Ni ges no.i gart ami ni ennemi.
Mas per so.l fatz que.ls crozatz vauc reptan
Del passatge qu'an si mes en obli.
Non cuidon qu'a Deu enoia
Que.ill se paisson e se van sojornan
E vos enduratz fam, set, e ill stan.

Seingner Conrat, la roda.s vai viran
In aquest mon pur en mal a la fi.
Quar paucs en sai que no s'anon penan
Com enganon vezi e no-vezi.
Mas cel que pert no.ill par joia.
Doncs sapchan ben, ceill qu'eu dic qu'aiso fan
Que Dieus escriu so que dig e faig an.

Seingner Conrat, lo rei Richart val tan
:si tot quan voill, de lui gran mal m'en di
Qu'el passera ab tal esfortz ogan
Con far poira.n -so aug dir tot de fi.
E.l reis Felips en mar poia
Ab autres reis. c'ab tal esfortz vendran
Que part l'Albre-Ses irem conquistan.

Bel Papiol, vas Savoia
Ten ton camin e vas Branditz brochan
E passa.l mar c'al rei Conrat ti man.

Quan seras lai, no t'ennoia!
Tu li diras que s'ar no.ill vaill al bran
E.il valrai tost, si.ll rei no.m van bausan.

Mas ben es vers qu'a tal domna.m coman
Se.l passatge no.ill platz, non crei que.i an.