Gerr'e trebailh vei et afan
Sufrir a mant baron truan.
Pauc m'es del dol e menz del dan,
Per qe.m vueilh alegrar chantan!
En joi estau e en joi pes,
E pensamenz no m'enpacha
Ni sabers no.m fa sofracha
A far un novel serventes.

Gerra.m plai, si tot gerra.m fan
Amors e ma donna tot l'an,
Qar per gerra vei trair'enan
Cortz e dos e solaz e chan.
Gerra fai de vilan cortes,
Per qe.m plai gerra ben facha
E.m plai qan la treg'es fracha
Dels esterlis e dels tornes.

Esterlins e tornes camjan,
Tollen e meten e donan
Veirem dels dos reis derenan
Lo menz croi, segon mon semblan.
Mas per o le coms-ducs-marqes
N'a ben sa peinhora tracha:
Malmetre lo fai per gacha,
Co dison Gascon es Engles.

Mas no crei, Frances ses deman
Tengan lo deseret qe fan
A tort a mant baron presan.
Per o meravilha.m don gran
Del seinhor dels Aragones
Qar a lur dan non destacha,
Pueis a los ades a pacha
Desmandatz le coms-ducs-marches.

En breu veirem qal mais poiran
Sofrir lo maltrach e.l masan!
Man caval bai e man ferran
Veirem, e mant elm e man bran
E man colp ferut demanes,
Man braz, manta testa fracha,
Man mur, manta tor desfacha,
Man castell forsat et conqes.

Qi vueilha n'aia mal o bes
O desenpach'o enpacha
O braz rot o testa fracha,
Q'aitan m'es del mort con del pres.

Gay mi ten una bella res
Avinenz, joves, ben facha,
Es ha a mi aital pacha
Co an Pisan am Genoes.