Eu m'escondisc, dompna, que mal non mier
De so qe.us ant dich de mi lausengier.
Per merce.us prec. q'om non puosca mesclar
Lo vostre cors fin, leial, vertadier,
Humil e franc, cortes e plazentier,
Ab mi, dompna, per messongas comtar.

Al primier get perd'eu mon esparvier
O.l m'aucion el poing falcon lainier
E porton l'en, q'ieu.l lor veia plumar,
S'ieu non am mais de vos lo cossirier
Que de nuill autr'aver mon desirier,
Qe.m don s'amor ni.m reteign'al colgar.

Autr'escondich vos farai plus sobrier,
E no.m puosc plus adorar d'encombrier:
S'ieu anc failli vas vos, neis del pensar,
Qan serem sol dinz cambr'o en vergier
Failla.m poders davas mon compaignier
De tal guisa que no.m posc'aiudar.

S'ieu per jogar m'asset pres del taulier
Ja no.i puosca baratar un denier
Ni ab taula presa non puosc'intrar!
Anz get ades lo reirazar derrier
S'ieu autra dompna mais deman n'enqier
Mas vos cui am e desir e teing car.

Seigner si'eu de castel parsonier
Et en la tor siam catre parier
E ja l'us l'autre non poscam amar,
Anz m'aion ops totz temps arbalestrier,
Metg'e sirven e gaitas e portier
S'ieu anc aic cor d'autra dompna amar.

Escut a col cavalc'eu ab tempier
E port sailat capairon traversier
E ceignas breus q'om non posc'alongar
Ez estreups loncs en caval bas trotier,
Ez a l'ostal trob irat l'ostalier
S'ieu agui cor d'autra dompna pregar.

Ma dompna.m lais per autre cavallier,
E pois non sai a que m'aia mestier,
E failla.m vens qan serai sobre mar,
En cort de rei mi batan li portier
Et en cocha fassa.l fugir primier
Si no.us menti cel qe.us anet comtar.

Dompna, s'ieu ai mon austor anedier
Bel e mudat, ben prenden e mainier
Qe tot auzel puosca apoderar
Sign'e grua et aigron blanc e nier
Volria lo mal mudat, gaillinier,
Gras, desbaten, qe non puosca volar

Fals enueios fementit lausengier,
Pois ab midonz m'avetz mes destorbier
Be.us lausera qe.m laissasetz estar.