Casutz sui de mal en pena
E vau lai o.l cors mi mena,
Don ja mais
No.m descargarai del fais!
Car mes m'a en tal cadena
Don mailla no.is descontena.
Car m'atrais
Ab un esgart en biais
Una gaia fresc'Elena.
Faich ai longa carantena,
Mas oimais
Sui al digous de la Cena.

Tant es d'amorosa mena
Q'eu morrai, si no m'estrena
D'un doutz bais.
Mas en trop d'orguoill m'eslais
De tota beltat terrena
Ant pretz las tres de Torena!
Fis essais,
Mas ill n'a sobr'ellas mais
Tant qant val mais aurs q'arena.
Q'eu no vuoill aver Torena
Ni Roais,
Ses lieis qe ja no.m retena.

Ja mais non er cortz complia
On hom non gab ni non ria.
Cortz ses dos
Non es mas gabs de baros
Et agra.m mort ses faillia
L'enois e la vilania
D'Argentos,
Ma.l gentils cors amoros
E la doussa cara pia
E la bona compaignia
E.l respos
De la Saisa.m defendia.

Ren de beutat non galia
Ni.n fai nuilla fantaumia
Lo joios
Joves gens cors amoros.
Anz genssa qui la deslia,
Et on plus hom n'ostaria
Garnizos,
Plus en seri'enveios!
Que la nuoich fai parer dia
La gola, e qi.n vezia
Plus en jos,
Totz lo mons en genssaria.

Doncs be.is taing c'amors m'aucia
Per la genssor q'el mon sia!
En perdos,
Qe qan remir sas faissos
Conosc qe ja non er mia.
Car chausir pot, si.s volia,
Dels plus pros
Chastellans o rics baros.
Q'en lieis es la seignoria
De pretz e de cortesia,
De gens dos
E de far que ben l'estia.

Domna, sai en Normandia
Suy per vos la nueit e.l dia
Apensos,
Que.l vostre gens cors joyos
Me sembla qu'ades me ria.