prosody | miscellaneous |
Si.m ten Amors ab douz plazer jauzen, Qe dinz mon cor port de fin joi la clau, Que.l cautz ni.l freigz, ni.l braus temps ni.l soau No.m nozon ren! tan mi vai ben e gen Qe tot m'es plazen, E mos enemics Non tem, tan sui rics De joi e d'amor En qe m'alegor! C'aitals ricors mi soste Et autra no.m tenc en re. C'aitals ricors m'abeillis, qan soven Penz del thesaur de cui eu tieing la clau, En tal plazer, si tut m'estau suau, Qe re mas joi dedinz mon cor non sen, Si.m vai dolzamen! E gelos enics No.m pot far destrics A jauzir l'onor En qe m'alegor! Car ai triat, per ma fe, Miels de meilor e de be. Tot lo dreig cors sai d'amor finamen, Aisi con sel qi d'Amor ten la clau! Per que chauzi vos, domna tot soau, Per la meillor e per la plus plazen, Que non i a conten! Ni anc fals prezics D'omes moys ni trics Jorn no.m fes paor! Per q'ieu m'alegor De tot, qar pro no lur te Fals mentirs, ni notz a me. Vostra valors estai seguramen, Qe nuls laire no.n pot far contra-clau! Et a mi vai sobreben e soau, Qar la gardatz ab mesur'e ab sen! Tam ben qe no.i pren Crims dd crois mendics! Ni negus afics De lauzenjador No.m tol ma legor, Ne l'onrat joi qe.m mante, Domna, en vostra merce. Be.us dic lauzor verai'adrechamen, Domna plazen, car vos tenetz la clau D'onrat pretz fin e car, ab un suau Sobregentil segur captenemen! Per qe.l conoissen, De qu'eu sui amics, Dizon q'etz abrics De vera valor! E prenc ma legor Car ditz, qi.us au ne vos ve, Qe mais ni meinz no.us cove. Domn'ai e segnor E joi e legor, Sordel, per qe.m vai tam be Q'emveja no.us tenc de re. Sordel, a vos et a me Vai d'amor si con cove. |