prosody | miscellaneous |
Rics pres, ferms e sobeirans, Domna, vos ten sobeirana, E be sai q'es miel certana, Dont ieu vos sui homs certans! E per los oils de ma cara, Bella dompna, plazenz, cara, Anc no.us ai voluntat vana Ni.us fui un jorn flacs ni vans! Pero mais non viurai sanz, Si vostre gentz cors no.m sana. E si vostre bels cors planz Lo mal q'eu ai no m'aplana, Ni vos n'estatz segurana, De la mort sui seguranz! Car lo mals d'amor m'afara Lo cors e.l cor, si que ara Ai mal q'Amors lo m'amana, Qar mi loing de vostras mans! E si ja.us estauc loindans, Jes ma mor no.us er loindana. Rics fora, s'istes propdans De vos ni.m fosses propdana! Qar hanc nulla crestiana Non amet tant crestians Com am vos, qe.m faitz avara Autr'amor, tant qe no.s vara Mos cors de vos on pres grana! Qar vos es de valor grans E non par siatz de grans Qi.us aia color de grana. Mais n'amera Catalans, Si vos fosses Catalana! Pero, car es Castelana, Volgr'ieu esser Castellans! Qe.l cossir mi tol e.m gara Vostre gentz cors, qant m'esgara! E car mi semblatz serrana, Sui sers dels vostres serranz! E servira.i Surianz, Si vos fossetz Suriana. Ja nuls lauzengiers trafans, Ni gelos, ni genz trefana, Ni hom qui ab ditz vilanz Fai sa lengua trop vilana, Non tolran qe ieu ancara Non mir vostra faizon clara, Per lur garda soteirana Ni per gardars soteirans: No.i s'es mes gaire mejanz, Mas d'Amor, qi es mejana. Domna, douzamenz m'agrana Ab finz jois chascuns dels grans Qe.m detz, e se ja viu sanz Aiso.m tol la mort e.m sana. N'Audeiart dels Baus, certana Valors e fins pres certans Fan vostres faigz sobeiranz E vos de pretz sobeirana. |