prosody | miscellaneous |
Pus que tug volon saber Per que fas mieja chanso, Ieu lur en dirai lo ver: Quar l'ai de mieja razo! Per que dey mon chant meytadar, Quar tal am que no.m vol amar! E pus d'amor no.i es mas la meytatz, Ben deu esser totz mos chans meytadatz. Tan hi ai mes mo voler, Que per oc penrai lo no, Et am mais de lieys l'esper Que d'autr'aver guiardo, Quar ylh non a de beutat par, D'aculhir ni de gent honrar, Per que mos cor es en lieys tan fermatz Qu'en dreg d'amor autra del mon no.m platz. E pus a tot son voler Me ren e m'autrey e.m do, Merces me degra valer! Pero sieus serai e so, Qu'Amors la.m fai tan dezirar On que m'an, qu'al re no puesc far! E tan me plai sos sens e sa beutatz Qu'ops m'es qu'ieu l'am, si tot no suy amatz. Sabetz per que.m dey alegrar, Plazenz dona -- quar m'aus pessar Qu'enquer per vos poiri'esser amatz: Veus tot lo joy per qu'ie.m suy conortatz. |