prosody | miscellaneous |
Lo bels terminis m'agenssa Et ai joi qec dia, Car ades ai sovinenssa -- on qez eu m'estia-- De mos amics de Proenssa! Pero si.ls vezia, Car ab lor ai conoissenssa, Plus m'alegraria! E s'ieu lor dic lauzor, Dreitz es, q'ill ant valor E de pretz onrat la flor E de cortesia. Us qe.m porta malvolenssa Fugic Lombardia Per deleial captenenssa. Qui.l conoisseria, Joglars es, a ma parvensa, Fals ab lecharia, E viu sai, per ma crezensa, Per sa joglaria. Conoissetz lo, seignor Que de mi fai clamor Et anc no.ill fi desonor, Mas ben la.ill diria. Joglars garnitz ai temenssa Que mala res sia Et ab pauc de retenenssa Pois qe is enrabia. C'un sai n'a de part Plazenssa Que, si.m conseguia, Per aitan cum val Argenssa Viu no.m laissaria. E car m'en don paor, Fatz prec al Creator Que me fassa tant d'onor Qe.m gart de sa via. Joglars vai per penedenssa Ades tota via Garnitz de desconoissenssa, Pois fetz la bausia. Iniquitatz par que.l venssa! E qui la.il trazia, Eu me don gran pessamenssa Cum puois parlaria. E s'ieu.l dic desonor, Reprenden sa follor, Ges non o dic per s'amor, C'aitant m'i perdria. Car non a reconoissenssa De sa vilania, Dic que per sa recrezenssa Jazer non poiria Ab sa moiller c'ades genssa! Pero si.l muria, A totz o dic a presenssa Qu'il no.l ploraria, Anz cre ben qu'il ador E prec nostre Seignor Que don al joglar dolor Tal que tost l'aucia. Lai man al trobador D'aver, non ges d'onor, Que ren non val ad amor Hom que joglars sia. |