Main PageTroubadours' ListingMore Works by Peire Bremon Ricas Novas

The prosody guide is available as a book. Click here for details.

Un sonet novel fatz
Per joy e per solatz!
E non es ges mos gratz,
Mas qar als adregz platz!
Que si no.n fos blasmatz
Non chantera mais re,
Pus vey q'umilitatz,
Ni pretz, ni amistatz
Ab mi dons pro no.m te.

Grans mals n'ai sofertatz,
Fis amans non amatz!
A las horas ai patz,
Maynhtas vetz sui iratz!
Be.n son apoderatz,
Qu'estat n'ai, per ma fe,
Cum hom desesperatz
Be.n a dos ans passatz,
E ges no me.n recre.

Ges, segon los pluzors,
Fenhens galiadors,
Non amarai alhors,
Sia sens o folhors!
Tant es grans sa valors
E.l beutatz qu'a ab se,
Qu'ilh es miralhs e flors
De totas las melhors,
Al jutjamen de me.

Mout mi ten car Amors
Son pretz e sas valors,
E.ls guazardos aussors!
Mas pro.m dona dolors,
Pauc mi fai de socors
E d'ajud'e de be,
Meyns qu'a totz amadors!
Estiers quar m'es honors
Qu'ades mi ten ab se.

Domna cueynhd'ab cors guay,
On joys e pretz estay
Mais q'ieu no dic ni sai,
Vos am mais que.us dirai!
Mas autre pro non ai:
A suffrir me cove!
Doncs me.n conortarai
Enaissi cum poirai
Ab lo mal que me.n ve.

Chansos, quant seras lai,
Mon cossir li retrai,
E di li per que.m fai
Morir en tal esmay!
Pueys te comandarai,
Si s'azauta de te,
Tro ins el cor li vay,
Qu'adoncs hi trobarai
Ben leu mais de merce.

Domn'ab . . . pretz verai,
Ja mais no.us prejarai,
S'eras no.i trop merce.