Main PageTroubadours' ListingMore Works by Peire Bremon Ricas Novas

The prosody guide is available as a book. Click here for details.

Ben deu istar ses gran joi totz temps mais
Cell qui no.s pot partir de son seinhor,
Qan per servir non pot aver s'amor,
Ni no ha cor qe del servir se lais!
Piez trai de prico
E plus greu martire!
Qan ses gizardo
Serv, e qe s'albire
Qe bes ni graz no.l n'eschaia,
Be m' es semblan qe mal traia.

E totz seinhers deu estar en pantais,
Qan sap qe.l sieu han gaug s'el pren honor,
Si no los creis e no.n lur ten amor,
Pos lo servon de bon cor ses biais!
Qar seinhor fello
Tainh qe Dieus azire,
Qant ha, ses razo,
Cor de.ls sieus aucire!
Ez er greu qe non deschaia
Qi.ls sieus destrui ni esmaia.

Tot aisso dic con fins amics verais
Per ma donna, e non fas ges clamor!
Q'ab tal plazer sai dezirar s'amor
Qe jauzentz sui d'aisso q'autres s'irais!
Q'a mi saupra bo,
S'ill mi deinhes dire,
Per merce, de no
Del joi q'ieu dezire!
Qar ja non er q'a leis plaia
Q'ieu mon dezir li retraia.

Anc ren no.m det, ni.m promes, ni m'estrais,
N'ieu no lo.l qis! anz mi fai tal paor
Q'ieu no.il aus dir con li tenc fin'amor,
Ni ja null temps no m'ensira del cais
S'ill no me.n semo,
Ni ai cor qe.m vire
Per dan ni per pro
Ni per nuill cossire!
Q'ab un dous desir m'apaia
Qar aus dezirar q'il m'aia.

En ma donna non tainh ni mens, ni mais,
E pares be a sa vera valor
Qez ill tem Dieu e Dieus li ten amor,
Qar anc non fes re mas aqo qe tais!
Per q'en luec de do
Jauzisc, qan remire
Sa plaisen faisso,
Si tot me.n suspire!
Q'ieu non vueilh re qe.l sostraia
Sa vera valor veraia.

Tan m'es bel e bo,
Qan ieu li remire
La boc' e.l mento,
Qe d'un dous dezire

Viu joios, si tout m'esmaia,
Qe.l plasentz vesers m'apaia.
Nulls lausengiers non m'esmaia,
Antz prec Dieu toutz los deschaia,