Main PageTroubadours' ListingMore Works by Peire Bremon Ricas Novas

The prosody guide is available as a book. Click here for details.

Ben farai canson plasen,
Si puosc, qu'er leus per cantar,
Car dison ce mon trobar
Comensiei trop sotilmen!
Ma li bon coneisidor,
Ce sabon causir,
Tenon, so m'albir,
So ce mais val per meglior!
Per c'a mon grat farai canson cabal,
Bella donna, de vos, per cui pres val.

Anc re non vi tan plasen,
Dompna, con vostre cors car!
Per c'ab gioi dei merceiar
Mon cor, mos uoglls e mon sen,
Ce.us m'an dat per servidor!
E dei lur grasir,
Car mi fan murir
Desiran la vostr'amor!
E si tut muoir, dei aver gioi coral,
Car nuls viures mon dos morir non val.

La beutat e.l ris plasen
Que.us fan dintc mon cor intrar
Non puosc anc pro remirar,
C'ades n'ai major talen
Con plus mir vostra color.
Uns giois ab desir
Mi fai esgiausir,
Can vei la nova frescor,
E.l bels vesers m'aleuja del greu mal
Qe.m sen, donn' ab cui gaucimens no val.

Aisi.m dones gioi plaisen
Con es de valor sen par,
Dompna, c'ab dret dei giugiar,
E par ben al convinen
Que dic vos vera lausor!
Ce de vos servir
Son tut miei consir,
E tenc m'o a tal onor
C'en dret d'amor de nul'atra no.m cal
E desir vos, ab cui merces no.m val.

Si.m degnes eser plasen
Q'ieu l'auses merce clamar,
De gioi me.n vengr'a plurar,
Tant n'agra mon cor gausen!
E car me.n deras legor,
Degras mi sofrir
C'ieu vos auses dir
E mostrar ma greu dolor!
Ce dompna deu a servidor lial
Ben sofrir so de c'ela mens no val.

Dompna, non dic per clamor
Ren ce m'augias dir,
Q'en pas voigll sufrir
L'afan don sospir e plor!
Car ses forfac mi das turmen mortal,
Per c'er pecatc, s'ab vos merce no.m val.

Quals qe lauze la meglior
Vos sap gen servir,
E no.i pot faglir,
Ab que lause la gensor!
De vos o dic, dompna, se Dieus me sal,
Que.l gensers es e nenguna no.us val.