Main PageTroubadours' ListingMore Works by Peire Bremon Ricas Novas

The prosody guide is available as a book. Click here for details.

Ben dey chantar alegramen,
Que.l dous dezir me.n son aiziu
Del ric, sobronrat senhoriu
Don tenh lo cor, e.l cors, e.l sen!
E qui que.n cosselh ni.n quil,
D'amar vos suy el dreg fil
Don ja no.m partray!
Qu'ab fin cor verai
Vos mi diey tot, dompna, per ver,
La genser qu'ieu puesca vezer.

Dompna, tug belh captenemen
Son el vostre gen cors aiziu,
El honrat quar pretz senhoriu!
E.l vostre fag son d'avinen,
E.l dig plazen et humil
Ab guay solatz e gentil.
Ay, quora.us veyray
Gran enveya n'ay!
Pero, si tot no.us dic plazer,
Anc re no fetz tam belh vezer.

Anc del vostre belh cors plazen,
Si tot miey huelh no.us son aiziu,
Pus fuy el vostre senhoriu,
Pueyssas non aic demembramen!
E quar dic ver e non guil,
Meravillaran se.n mil!
Plus non despondray,
Mas vos sabetz lay
Qu'ieu suy sai el vostre poder
Ab dezir gran de vos vezer.

Mout mi desmentis dossamen,
Una vetz qu'ieu.s era d'aiziu!
Per que del honrat senhoriu
Pueys non parti mon ferm talen.
Que tot mon cor hi apil!
Si qu'en may ni.l temps d'abril
Gran joy non auray!
Quar ges no s'eschai
Qu'en Pascor deya joy aver,
Si doncx no.us anava vezer.

Fals lauzenjador maldizen,
De totz mals siatz vos aiziu,
Et hieu del honrat senhoriu
Que.m ten mal vostre grat jauzen!
Trop cujatz esser sotil
D'aquel vostre mestier vil!
Mas una me.n play
Que totz vos dechay!
E quar avetz tan croy saber,
L'auzir perguatz vos e.l vezer.

Nulh temps non aigui pro lezer,
Bona dompna, de vos vezer.