Main PageTroubadours' ListingMore Works by Daude de Pradas

The prosody guide is available as a book. Click here for details.

El temps que-l rossignols s'esgau
E fai sos vers sotz lo vert fuoill
Per sa pareilla, qan l'acuoill,
No-m laiss'amors estar soau,
Anz vol qu'ieu chant, o vuoill'o no,
Cill que m'a tengut en preiso
Tant longamen c'apenas sai
Si poirai viure, si-m n'estrai,
Que mais non torn en son estatge.

Ab bel semblan et ab cor brau
A tengut, cill cui amar suoill,
Aissi lonc temps mon cor en vuoill
Que l'uoill m'en son tornat tot blau.
Totz hom qu'en amor s'abando
En trop ric luoc, sap per razo
Cal angoiss'a, ni cal mal trai
Qui ama so que no-ill eschai,
Si Merces noi forssa paratge.

De Joi Novel segiei l'esclau,
Tro fui vengutz a son capduoill,
On mi mostret tant gran orguoill
Cum si tengues del mon la clau.
Del covinen mi fetz tenso,
Cais que disses: e no i a pro,
S'ab pessamen cortes e gai
Vos sai donar joi et esmai
E-us fatz plazer vostre dampnatge

En greu pantais viu et estau
E res no m'aven de qant vuoill,
Ni garir d'aiso don mi duoill
Non puosc, s'a Bel Desir non vau
Querre capteing contra leo
Que-s fiza tant en sa faisso
Que so que-s vol fai e desfai,
E trop l'ancse de pejor plai
On plus li sui de franc coratge.

Ab tal agur intriei e nau
Lo jorn qe-m mostreron miei huoill
Una falsa ren, don mi duoill!
Que d'amor muor e si m'en lau.
Anz mais hom tan marritz no-n fo!
C'autras no m'ant ni mieus non so,
E puois autre ni ieu no m'ai,
Ben pot saber, no m'aura mai
Cill que no volc mon homenatge.

A mon amic, vas cui s'atrai
Pretz et Valors en tot cant fai,
Chanssos, ten ton primier viatge.