| |
|||
| prosody | miscellaneous |
Amors m'envida e-m somo Qu'ieu chant e fassa a saber Cossi-m ten Amors en poder, O si m'es trop mala o no! E pois vei ques il m'en apella, E-ill sazos, q'ades renovella, Ben es dreitz qu'en chantan retraia Coissi-m conorta e m'apaia Uns jois qui s'es e mon cor mes, Per bon respieich que m'a conques. De totz los bens qu'en amor so, Ai ieu ara calque plazer, Car ieu ai mes tot mon esper, Mon penssar e m'entencio En amar dompna coind' e bella, E soi amatz d'una piucella, E quan trob soudadeira gaia, Deporte mi cossi qe-m plaia! E per tant non son meins cortes Ad amor si la part en tres. Amors vol ben que per razo Eu am mi donz per mais valer, Et am piucella per tener! E sobre tot qe-m sia bo S'ab toseta de prima sella, Qand es frescheta e novella, Don no-m cal temer que ja-m traia, M'aizine tant que ab lieis jaia Un ser o dos de mes en mes, Per pagar ad Amor lo ces. Non sap de dompnei pauc ni pro Qui del tot vol si donz aver. Non es dompneis, pois torn'a ver, Ni cors s'i ren per guizerdo. Aia-n om anel o cordella, E cuich n'esser reis de Chastella. Pro es dompneis d'amor veraia, Si joias pren e, qan pot, baia! E-l sobreplus teigna Merces En thezaur, e no-n done ges. Franca piucella de sazo Mi platz, qand m'es de bel parer, E-is vai de josta mi sezer, Qan sui vengutz en sa maiso! E si-l vuoill baisar la maissella O-il estreing un pauc la mamella, No-is mou ni-s vira ni s'esglaia, Anz poigna cum vas mi s'atraia, Tro que-l baisars en sia pres E-l doutz tocars de luoc deves. De soudadeira coind'e pro Vuoill qe-m don' ab pauc de querer Tot so c'Amors vol a jazer, E non fassa plaig ni tensso D'ostar camisa ni gonella, Anz danze segon qe-l viella Cel que non a soing qe-is estraia De far tot ioc q'Amors l'atraia! E s'il n'avia mais apres, Ja de l'enseignar no-is feisses. |