Main PageTroubadours' ListingMore Works by Daude de Pradas

The prosody guide is available as a book. Click here for details.

Ben deu esser solatz marritz
Et Amors trista e marrida,
E pauc deu hom prezar lor vida
E tot lo ben c'om a lor ditz,
Car cel per cui valia
Solatz e cortesia,
Chans e deportz, Jois e Merces,
Lor es faillitz, don grans dols es.

Ja mais bons vers non er auzitz
Ni cansos per razon complida.
Amors, morta es vostra crida,
Que ditz que vos etz esperitz
Cortes, e ver dizia.
Tals hom vos covenia!
Tuich chantador eron nonres,
Qan volia dir qe-us plagues.

Anc hom non dis motz tant grazitz
Ni anc lengua tant issernida!
Que sa votz era tant polida
Qe-l rossignols er' esbahitz
Qan son doutz chan auzia!
E pro senes faillia,
Mais que hom que ieu conogues.
Per so l'a Dieus a son ops pres.

Jhesu Crist prec qe-il sia guitz
E-l paus a Ia destra partida
C'a sos amics a establida,
C'adoncs er ben lo luocs garnitz.
Dompna Sainta Maria,
Per consseill vos daria:
Si-us azautatz d'ome cortes,
N'Ugo Brunenc non laissatz ges.

Trop es caitius et adormitz
Totz hom cui Avoleza guida,
Car si pert e-l segle oblida!
E quand es d'aqest mon partitz,
Dieus non vol sa paria,
Mais en enfern l'envia,
On estai totz de penas ples,
E ia mais non er qui d'el pes.

Vas Salas ten ta via,
Plans, car lai trametia
Chanssos e vers e sirventes
Cel cui deu ben plaigner Rodes.

Bels Desirs, on q'ieu sia,
A en mi seignoria
Per far e per dir qe-il plagues!
Et anc no-l vi, mas el cor m'es.