Main PageTroubadours' ListingMore Works by Daude de Pradas

The prosody guide is available as a book. Click here for details.

Trop ben m'estera si-s tolgues
Amors de mi et ieu d'Amor!
Q'ieu no-n ai re mas la dolor,
Et ill vol de mi totz sos ses:
Q'ieu chant e-m deport e-m solatz,
Non per mi, mas car a lieis platz!
E ill non faria per me
Neis mal, si-m cujava far be.

Amors, ab vos no-m val Merces,
Ab franquesa ni ab dolor!
Car vostr'orguoill, vostra ricor,
Non vens humilitatz ni bes.
S'om vos blandis, vos menassatz!
Qi-us menassa, vos sopleiatz!
E qi-us ama, nuill pro no-il te!
E qi-us vol mal, gau s'en desse.

Amors, de vos ai tant apres:
Qe-il fals truan e-il trichador,
Que non temon Dieu ni honor,
E-is feignon de non ren cortes,
Ant de vos lo baisar e-l bratz,
E, per malaventura, jatz,
E vers amics de bona fe
Non aura ja ni so ni que.

De dompnas hi a mais de tres,
Que, qand remiron lor color
E lor beutat el mirador,
Non cujon que sia mais res.
Pauc ant ben legit, so sapiatz,
Cum beutatz vai e fail viatz,
Q'en pauc d'ora plus bella ve
Aco sem que sol vezer ple.

Un an volgra que s'avengues
Que s'accordessen entre lor
Cil que son leial amador,
Que ja negus precs non fezes!
C'adoncs paregron li malvatz
E las malvazas a un latz,
Q'ant mort dompnei e joi ancse,
Pels baratz que fan entre se.

Bels Sirventes, de vos mi platz,
Que ma chanson primiers aujatz,
E ja hom no-m deman per que!
Mas car vos am aitant cum me.