Main PageTroubadours' ListingMore Works by Folquet de Marselha

The prosody guide is available as a book. Click here for details.

Mout i fetz gran pechat Amors,
Quant li plac que.s mezes en me,
Quar Merce no.i aduiss ab se
Ab que s'adousses ma dolors!
Qu' Amors pert so nom e.l desmen
Et es Dezamors planamen
Pos Merces no.i pot far socors!
Per que.l fora pretz et honors,
Pos ylh vol venser totas res,
Qu'una vetz la venques Merces.

S'ar no.us vens, vencutz sui, Amors!
Venser no.us puesc mas ab Merce!
E' s'entre tans mals n'ai un be,
Ja no.us er dans ni desonors!
Cujatz vos doncs que.us estei gen
Quar mi faitz planher tan soven
Ans en val meyns vostra lauzors!
Pero.l mals mi fora doussors,
Sol l'aut ram a qu'era.m sui pres
Mi plejes, merceian, Merces.

Mas no pot esser, pos Amors
Non o vol, ni midons, so cre!
Pero, de midons no sai re,
Qu'anc tan no m'enfoli Follors
Qu'ieu l'auzes dir mo pessamen,
Mas cor ai que.m cabdel ab Sen
De l'Ardimen que.m tol Paors!
Pero Esperars fai las flors
Tornar frug, e de midons pes
Qu'esperan la vensa Merces.

Mas trop m'a azirat Amors
Qar ab Merce si dezave!
Pero.l miels del miels quez hom ve,
Midons, que val mais que valors,
En pot leu far acordamen,
Que major n'a fag per un cen:
Que ve com la neus e.il calors,
So es la blanquez' e.il colors,
S'acordon en lieis, semblan es
Qu'Amors s'i acort e Merces.

Estiers no puesc durar, Amors,
E no sai cossi s'esdeve
De mon cor - qu'aissi.us a e.us te
Que re non par que n'ai' alhors -
Quar, si be.us etz grans, eissamen
Podetz en me caber leumen
Quo.s devezis una grans tors
En un pauc miralh, e.il largors
Es i tan grans que, si.us plagues,
Enquer neys y caubra Merces.

Mal mi sui gardatz per no-sen,
Qu'a mi eis m'a emblat Amors
Ar qu'er' estortz de sas dolors!
Mas dir puesc qu'ieu eis m'i sui pres,
Neis no m'en val Dregz ni Merces.

N'Azimans, lo vostre socors
E d'en Tostemps vuelh ben alhors,
Mas d'aisso no vuel sapchatz ges,
Qu'a penas neis o sap Merces.