prosody | miscellaneous |
Si tot m'ai tarzat mon chan Ni n'ai faich trop long estatge, Eras ai cor e talan Q'en torn la perd' e.l damnatge, Qe.l bella.m dreiss' al viatge E.m ditz q'ieu mostr' en chantan Lo joi e la valor gran Qe.m donet, e l'alegratge Lo jorn qe.m retenc baisan. Adoncs l'estei tant denan, Mas jointas, de bon coratge, De genoillos, en ploran, Tro.m pres en son seignoratge! Mas al prim li fo salvatge, Car m'ausiei enardir tan -- Pois vi mon humil semblan, E receup mon homenatge, Car mi conoc ses engan. Amics, qan si vol partir De si donz, fai gran enfanssa, Si tot no.il vol acuillir Sos digz a la comenssanssa! Q'amors s'abriv'e s'enanssa Ab honrar et ab servir! E qui.s vol de lieis jauzir Sia.il de bella semblanssa, E sapch' amar e sofrir. Mi donz am tant e desir Qe, qi.m meti' en eganssa, En tant cum hom pot chausir Non penri' en acordanssa Que ja mudes m'esperanssa, Ni.s camjesson miei desir! Ni non vuoill esdevenir Senes liei seigner de Franssa Gardatz si voill q'ill m'azir Maintas sazos s'esdeve Qu'en pens tant fort e cossire, Qe non auch qui parl' ab me, Ni fatz mas tremblar e frire! E pens que Dieus volc assire Mas q'en una sola re Las beutatz qu'ill a ab se, E.l gen parlar e.l doutz rire, Ab qe m'alegr' e.m rete. Tot ai per ma bona fe Conquis so don sui jauzire, E prec mi donz per merce Qe.l sieu cors del mieu non vire, Qe sos hom e sos servire Sui et ai estat ancse -- Et ades poja e ve L'amors, e doblo.il desire On il plus mi fai de be. Linhaure, lai vir mon fre Vas Santongier, cui desire E vuoill s'amor e son be. |