| prosody | miscellaneous |
Ar es lo montc vermellc et vértc E de mantas colors cubèrtc, E rema·l brun' aura negra, E l'ausel desseron lur bècs! Per c'ieu ai talent che despléc Tal un vers ce far no pogra Mentre ce·l desturbiers me tenc. Mas era m'esmend' e m'endértc Los maltraitc c'avia sufèrtc, Non gies cill ce far o degra, Mas autra, ce·m trais fors los dècs Can vic lo gran affan qui·m créc, Don giamais mos cors no·s mogra Si·l fins giois no fos, ce·m revenc . . . . . . de midons, qi m'a si aut dértc, Per c'ieu puosc e dei esser cèrtc Qu'ill a me no s'eschasegra Mais, pos que·l platc — eu no ssoi pècs — C'a sson plaser ab lieis m'apléc — E l'autra, c'ades mi nogra, Torne s'en ab aquo qe venc Ab son engan, qui·s vair e vértc Et ab sos bels ditc fals, cubèrtc, S'en torn' et ab s'amor negra, C'a doas lengas e dus bècs, Mas lieis non cal, qui·s qu'en despléc, Lo ver del mal qu'ieu dir en pogra, Si·m volgues, pel dan en que·m tenc. No·s tainh, que·l bela m'o endértc, E ssi tot eu ai lai sufèrtc Los dantc que sufrir non degra, Tuogll m'en, e met' ab leis mos dècs, Cui grazisc, car mi det e·m créc, Che gia per autra no mogra Mos cors, del mal c'a me revenc. Per so, dic c'a bona fe·m dértc Ma dompna, e ssoi ne ben cèrtc — Mais dic, ce no m'escasegra, Neus q'eu en pens, e ssoi ben pècs —Per qe — car dic c'am lieis m'apléc — — mi trac doncs — oc — nonca·m nogra Ver dir del fi gioi que me venc. — si fera, que·l giois es trop vértc, E gia·l dirs no·n fura sufèrtc Per lieis, e non s'escasegra, Que d'uns n'i a, ab trenchans bècs, Tals c'anc giois ab lur vol non créc Ans si pogues, cacs mi nogra Ab lieis de cui mi meteis tenc. D'on deport, lieis mon vers despléc, Denant N'Agout, de cui mogra Si·l giois non fos ce sai mi venc. |
Metrical pattern: 875d